ഇറുകിയ ഷൂസിൽ നിന്നും പുറത്തിറങ്ങിയ കാൽപാദം. "Foot freed from tight shoes"

നിരന്തരം

ആത്മഹത്യാ ഭീഷണി

മുഴക്കുന്ന

ഒരു

കാമുകിയുണ്ടോ

നിങ്ങൾക്ക്?

​വാട്സാപ്പിൽ

ഇടതുവശം ചേർത്ത്

മൂർച്ചയുള്ള ബ്ലേഡ്,

ഒരു പിടി ഉറക്കഗുളിക,

കുരുക്കിട്ട കയർ

തുടങ്ങിയവയുടെ

ഫോട്ടോകൾ

അയച്ചുതരാറുണ്ടോ?

​നിങ്ങളുടെ

ലഭ്യതയെ പ്രതി

നിരന്തരം

ആവലാതിപ്പെടാറുണ്ടോ?

​വേവലാതിയാൽ

പാതിരാ കഴിഞ്ഞും

"മിണ്ടൂ... മിണ്ടൂ..."

എന്ന്

നിങ്ങളുടെ ഉറക്കത്തെ

അറുത്തുമാറ്റുന്ന

ഒരു

കാമുകിയുണ്ടോ

നിങ്ങൾക്ക്?

​ഒരുവിധം കൂട്ടിയോജിപ്പിച്ച

ഉറക്കത്തെ

രാവിലെ

കിടക്കയിൽ കുടഞ്ഞിട്ട്

ഞെട്ടിയുണരുമ്പോൾ

മൊബൈലിൽ വന്ന

അവസാനത്തെ

സന്ദേശം കണ്ട്

ദേഹമാസകലം

വിയർത്ത്

കിടക്കയിൽ

ഇരുന്നുപോയിട്ടുണ്ടോ?

​അവളുടെ

വീട്ടിലേക്ക്

ആളുകൾ കൂട്ടംകൂട്ടമായി

പോകുന്നുണ്ടോ

എന്ന്

ദൂരെ മാറിനിന്ന്

നോക്കിയിട്ടുണ്ടോ

നിങ്ങൾ?

​വേഗത്തിൽ

നിങ്ങളെയും കടന്നുപോയ

പോലീസ് വണ്ടി

അവളുടെ വീട്ടിലേക്കല്ല

എന്നറിയുമ്പോൾ

ആശ്വാസം കൊണ്ടിട്ടുണ്ടോ?

​നിങ്ങളുടെ

മൊബൈൽ ഫോൺ

സൈബർ സെല്ലിലെ

മേശമേൽ

സീഷർ മഹസർ പ്രകാരം

ബന്തവസിൽ എടുക്കപ്പെട്ട്

വിശ്രമിക്കുന്നതിനെ കുറിച്ചോർത്ത്

ഉണ്ണാതെയിരുന്നിട്ടുണ്ടോ?

​വീണ്ടും

വയലറ്റ് പൂക്കൾ തുന്നിയ

അവളുടെ

പ്രൊഫൈൽ പിക്ചറിന് താഴെ

Online

എന്ന്

കാണുമ്പോൾ

ദീർഘമായി ശ്വസിച്ചിട്ടുണ്ടോ?

​ആശ്വാസത്താൽ

ചുണ്ടിൽ വന്ന ചിരിയെ

വല്ലാതെ

സ്നേഹിച്ചു പോയിട്ടുണ്ടോ?

​അപ്പോൾ,

"എന്താണ്

നിങ്ങളിങ്ങനെ

ഒറ്റയ്ക്കിരുന്ന്

ചിരിക്കുന്നത്

മനുഷ്യാ...?"

എന്ന്

നിങ്ങളുടെ ഭാര്യ

നിങ്ങളോട്

ചോദിച്ചിട്ടുണ്ടോ?

​തീർച്ചയായും

പാകമാകാത്ത

ഷൂസിനുള്ളിൽ നിന്നും

പുറത്തിറങ്ങിയ

കാൽപ്പാദത്തിന്റെ

സന്തോഷത്തെക്കുറിച്ചാവും

നിങ്ങളപ്പോൾ

ചിന്തിക്കുക.