പറഞ്ഞു കേട്ടത്-Paranju-kettathu

ഈറൻ മുടി പകുത്തു പിന്നിയിട്ട്

വെള്ളയും നീലയും

യൂണിഫോമണിഞ്ഞു പുലരി

പടിഞ്ഞാറോട്ടുള്ള

ആദ്യത്തെ വണ്ടിയും കാത്ത്

നിൽക്കുകയാണ്.

-

ഓല മേഞ്ഞ കുടിലിന്റെ

മേൽക്കൂര

അടക്കി പെറുക്കി

വെക്കുന്ന തിരക്കിലായിരുന്നു

കാറ്റ്

ഇതിനിടയിൽ

മുറ്റത്തു ഞാൻ നട്ട

വാഴക്കന്നു കുലച്ചത്

ആരോ വെട്ടിയെടുത്തു

കൊണ്ടുപോയി.

-

വെയില് വെന്തു തിളയ്ക്കുന്ന വയലിന്റെ

ഒത്ത നടുക്കിലൊരു

കൊറ്റി ഒറ്റക്കാലിൽ

ഇല്ലാത്ത മീനിനെയും

സ്വപ്നം കണ്ടു

കണ്ണടച്ച് നിൽക്കുന്നു.

-

ആരൊക്കെയോ

ചേർന്ന്

മൗനത്തിന്റെ തടാകത്തിൽ

തീ കോരിയിട്ട്

കത്തിക്കാൻ നോക്കുന്നു..

-

മഴ കൈവിട്ട

മെല്ലിച്ച പുഴ

മണല് കൂട്ടിയിട്ടു

വേഗത്തിൽ

ചെക്ക് ഡാമുകൾ പണിയുന്നു..

-

മരിച്ച ഭാഷയുടെ

ശവ മഞ്ചവും പേറി അയൽവാസികൾ

നടന്നു വരുന്നു.

തുഞ്ചൻ പറത്തിയ

തത്ത

കാക്കാലത്തിക്കൊപ്പം

കൂടി ചീട്ടുകൊത്തി

വ്യാജം പറയുന്നു.

-

നഗര മധ്യത്തിലൊരു

കോണിൽ

പ്രണയത്തിന്റെ

കഴുത്തറുത്ത്

മസാല പുരട്ടി

കമ്പിയിൽ കോർത്ത്‌

ആവശ്യത്തിന്

തീയും പുകയും കൊള്ളിച്ചു കരിച്ചെടുത്തു

പാത്രത്തിൽ വിളമ്പി

വെച്ചിട്ടുണ്ട്

വേണ്ടവർക്ക്

കഴിക്കാൻ പാകത്തിൽ.