ഉന്മാദിനിയുടെ പ്രണയം.

ഭ്രാന്തിയായൊരുവൾ പ്രണയത്തിലാകരുത്.

ആത്മഹത്യാ മുനമ്പിലേക്കുള്ള ഊടുവഴിയാണത്.

ഇടമുറിഞ്ഞൊഴുകുന്ന രാസാഗ്നികളുടെ

ഏറ്റക്കുറച്ചിലിൽ അവളവളെ പകുത്തിടുന്ന

ഇടമാണവളുടെ പ്രണയം.
-

വിറങ്ങലിച്ച , നിശബ്ദമായ പ്രാണനെ

വാക്കുകൾ തിരുമ്മി ജീവൻകൊടുക്കുന്ന

മജീഷ്യനാവും ഭ്രാന്തിയുടെ കാമുകൻ.
-

അയാളവളെ ആകാശമേഘങ്ങളിൽ വിവസ്ത്രയാക്കും

കടൽത്തട്ടിലെ പവിഴപ്പുറ്റുകൾക്കിടയിൽ

ചുബനങ്ങളാലവളുടെ ഹൃദയനോവുകളെ

ഊറ്റിയെടുക്കും.

ബോധാബോധങ്ങളുടെ മുടിനാരിഴയിലൂടെ

അവൾ പിച്ചവയ്ക്കുമ്പോൾ വിരൽകൊരുക്കും.
-

നിരാശ്രയത്വത്തിന്റെ കനൽവഴികളിൽ

അവളുടെ പച്ചമരത്തണലാവും.

നിർജ്ജീവ മിഴികളിൽ പ്രണയത്താൽ

സൂര്യശോഭയുദിപ്പിക്കും.

സ്നേഹം തൊട്ടുതൊട്ടവളുടെ കവിൾത്തടം

പൂത്ത കുങ്കുമപ്പാടമാകും...
-

അവൻ കടലാസിനാൽ പൂക്കളേയും ശലഭങ്ങളേയും പറത്തിയിട്ട്

അപ്രത്യക്ഷമാവുന്ന ഇടനേരങ്ങളിൽ

ചങ്ങല മുറിവുകളിലേക്ക് ഉപ്പെറിഞ്ഞവൾ

നീറിപ്പിടയും..

ശൂന്യ ലോകത്തിലയാളുടെ മറഞ്ഞുപോയ

ഗന്ധത്തിന്റെ വേരുതേടി

മരണത്തിന്റെ പടിവാതിലോളം നടന്നുചെല്ലും.