അപ്പുണ്ണ്യാരുടെ പ്രണയങ്ങൾ

അപ്പുണ്ണ്യാര് കാലാടുന്ന ബെഞ്ചിൽ ഒരു അഭ്യാസിയെപ്പോലെ മലർന്ന് കിടന്ന് അവൾ നൽകിയ ഈറൻ മന്ദഹാസമോർത്ത് നെടുവീർപ്പിട്ടു.അയാളുടെ പ്രണയകണക്കെടുപ്പ് തുടർന്നു.“ഏയ്…ഒന്നാമത് സരോജിനികുട്ടിയല്ല;അത് അവളായിരുന്നു.സുലോചന“ ആദ്യാനുരാഗത്തിൻ്റെ  ഓർമ്മയിൽ കുളിരുകോരി അയാളുടെ രോമങ്ങൾ എഴുന്നേറ്റു നിന്നു.ആ കുളിരിൽ മകരകുളിര് അയാളിലേക്ക് കൈകാലുകളിലൂടെയും കാതുകളിലൂടെയും അരിച്ചുകയറി.പത്ത് വർഷങ്ങൾക്കുമുമ്പ് ഇതുപോലൊരു മകരത്തിലാണ് അവളെ അപ്പുണ്ണ്യാര് കാണുന്നത്.

മൂത്താശാരിയുടെ വീട്ടിലെ വിത്തളവായിരുന്നു അന്ന്.മുത്തശ്ശൻ്റെ കെട്ടുനിറയ്ക്ക്  വന്നതാണ് അവൾ. വിത്തളവ് കഴിഞ്ഞ് ഇഡ്ഡലി കഴിക്കാൻ അവൾ വന്നാണ് തന്നെ ക്ഷണിച്ചത്. ജാത്യാൽ ഉയർന്നവനായത് കൊണ്ട് അവരുടെ വീടുകളിലൊന്നും കേറി കഴിക്കരുത് എന്ന തടസ്സം മനസ്സിൽ നിന്നിരുന്നെങ്കിലും “ഓ നിങ്ങളൊക്കെ ഞങ്ങടോടന്ന് തിന്നും കുടിക്കൊന്നും ചെയ്യില്ലെല്ലൊ“ എന്ന് പരിഭവസ്വരത്തിൽ ചോദിച്ചുകൊണ്ട് അവൾ പിടിവിട്ട് നടന്നുപോയി. തൻ്റെ മനസ്സിൽ ജാതിയും ഇഷ്ടവും തമ്മിൽ പിടിവലി തുടർന്നു.ഒട്ടുവിൽ അത് അവസാനിച്ചത് അയ്യപ്പൻ്റെ പ്രസാദമായി കരുതി കഴിക്കാമെന്ന് തീരുമാനത്തിലായിരുന്നു.   

പത്താം വയസ്സിൽ ബാബ ആറ്റോമിക് റിസർച്ച് സെൻ്ററിൽ സയൻ്റിസ്റ്റായിരുന്ന ശങ്കരമേനോൻ്റെ കുട്ടിയെ നോക്കാൻ പോയതാണ് അവൾ. വർഷങ്ങൾക്ക് ശേഷമായിരുന്നു അവൾ നാട്ടിൽ. അയാൾ അവളെ ആദ്യമായി കണ്ടത് അന്ന് കാലത്ത് മായൻകുളത്തിൽ കുളിക്കാൻ പോയപ്പോഴാണ്. വെള്ളം മേലേക്ക് വായ കൊണ്ട് ചീറ്റിച്ച് മലർന്ന് നീന്തുകയായിരുന്നു അപ്പുണ്ണി. ആണ്ണുങ്ങൾക്കും പെണ്ണങ്ങൾക്കും കരിങ്കല്ല് കൊണ്ട് ആൾമറ കെട്ടിതിരിച്ച കടവായത് കൊണ്ട് അപ്പുറത്തേ രംഗം കാണണമെങ്കിൽ മലർന്ന് നീന്തുക തന്നെ വേണമായിരുന്നു.അപ്പുണ്ണിയുടെ കൂടെ മിക്കപ്പോഴും സതന്തസഹചാരിയായ മൊയ്തുപ്പയും പിന്നെ കണ്ണൻചെക്കനും കാണും കുളിക്കാൻ.അന്ന് അവർ വന്നിരുന്നില്ല.തനിച്ച് നീന്താൻ മടി തോന്നിയിരുന്നെങ്കിലും അപ്പുറത്ത് നിന്നും വരുന്ന രാധാസ് സോപ്പിൻ്റെ മണം അത് തേയ്ക്കുന്ന മേനിയൊന്ന് കാണണം എന്ന മോഹം അവനിൽ ജനിപ്പിച്ചു. രണ്ടും കൽപിച്ച് വെള്ളത്തിലേക്ക് ചാടി ഊളിയിട്ടു. ഏകദേശം നടുക്ക് ചെന്നാണ് അവൻ പൊന്തിയത്. പിന്നെ മലക്കം മറഞ്ഞ് മലർന്ന് വായിൽ വെള്ളമെടുത്ത് മേലേക്ക് ചീറ്റിച്ച് ഇടം കണ്ണിട്ട് പെണ്ണങ്ങളുടെ കടവിലേക്ക് നോക്കി.തോർത്ത് മുണ്ടു മാത്രം ഉടുത്ത് അർത്ഥനഗ്നയായി തുണി തല്ലി തിരുമ്പുന്ന ശാരദയുടെ പിൻവശമാണ് ആദ്യദർശനം കിട്ടിയത്.പിന്നെയാണ് അതിനടുത്ത് ആൾമറയോട് ചേർന്ന് നിന്ന് തോർത്ത് മാത്രമുടുത്ത് രാധാസ് സോപ്പ് പതപ്പിച്ച് തേയ്ക്കുന്ന പതിനേഴ്‌കാരി സുലോചനയെ അവൻ കണ്ടത്. ആ കാഴ്ചയിൽ ഒരു നിമിഷം തണുത്ത വെള്ളം തിളച്ച് പൊള്ളുന്നതായി അവന് അനുഭവപ്പെട്ടു.അവൾ അവനെ കണ്ടതും വെപ്രപ്പാളപ്പെട്ട് കൈകൾ മാറത്ത് പിണച്ചു വച്ച് നാണം മറച്ചു.സോപ്പിൻ്റെ പതയാൽ അവളുടെ ദേഹം മൂടിയിരുന്നതിനാൽ അവൻ പ്രതീക്ഷിച്ചതൊന്നും കണ്ടില്ലെങ്കിലും അവളുടെ മുഖത്ത് വിരിഞ്ഞ നാണം അത് അവനിൽ അതുവരെ തോന്നാതൊരു വികാരമുണർത്തി. അവൻ വെള്ളത്തിൽ ഊളിയിട്ടു.

അവന് തോന്നിയ ആ വികാരമാണ് പ്രണയമെന്ന് പറഞ്ഞത് ദില്ലിയിൽ നിന്നും അവധിക്ക് വന്ന നാണ്വോരേട്ടനാണ്.നാണ്വോരേട്ടൻ ലീവിന് വന്ന എന്തിനും ഏതിനും അപ്പുണ്ണി വേണം.ചാരായം വാങ്ങിക്കാനും ചാവക്കാടൻ്റെ പീടികയിൽ പോയി പനാമ സിഗരറ്റ് വാങ്ങിക്കാനും ഒക്കെ അവനെയാണ് ഏൽപ്പിക്കാറ്.അതിന് കൂലിയും കിട്ടും. അന്ന് നാണ്വോരേട്ടൻ ചാമിയാര് പറങ്കിമാങ്ങയിട്ട് വാറ്റികൊണ്ടുവന്ന വാറ്റുചാരായം നുണഞ്ഞിറക്കി ആ തീ ഇറങ്ങുന്ന വഴിയിൽ ഗ്ലാസ് നെഞ്ചിൽ വച്ച് കുളത്തിൽ വീണ് കിടന്ന മകരനിലാവ് കണ്ട് കുളപ്പുരപ്പടവിൽ കിടന്ന് ദില്ലിയിലെ തൻ്റെ പ്രണയിനിയെപ്പറ്റിയും പ്രണയത്തെപ്പറ്റിയും പറഞ്ഞു. നാണ്വോരേട്ടൻ എപ്പഴും കൊണ്ടു നടക്കാറുള്ള വാക്ക് മാനിൽ നിന്നും സ്ത്രീ സ്വരത്തിൽ പ്രണായാതുരമായ ഒരു ഹിന്ദി യുഗ്മഗാനം ഒഴുകി വന്ന് അവിടം മനോഹരമാക്കി കൊണ്ടിരുന്നു.അപ്പോൾ ആ മുഖത്തെ ഭാവം അവൻ ജീവിതത്തിൽ ആദ്യമായി കാണുകയായിരുന്നു.അത് പ്രണയിതാവിൻ്റെ അവർണനീയമായ മനോലീലയുടെ ബാഹ്യർസ്ഥുരണമാണെന്ന് തിരിച്ചറിയാൻ അന്നായില്ലെങ്കിലും പിന്നീട് വേൽമുരുകൻകൊട്ടകയിൽ പണിക്ക് പോയി തുടങ്ങിയപ്പോൾ കണ്ട സിനിമയിലെ പ്രേംനസീറിൻ്റെo ജയൻ്റെം ഒക്കെ മുഖത്ത് പ്രണയരംഗങ്ങളിൽ വിരിഞ്ഞ ഭാവത്തെക്കാളും എത്രയോ മനോഹരമായ പ്രണയാതുരഭാവമായിരുന്നു അതെന്ന് തിരിച്ചറിഞ്ഞത്.

“പ്രണയം ഒരിടത്ത് കുറ്റിയടിച്ച് നിൽക്കുന്നതല്ല അപ്പുണ്ണ്യേ...അത് പ്രാണനുള്ളടതോളം കാലം ഒന്നിൽ നിന്നും മറ്റൊന്നിലേക്ക് പ്രയാണം ചെയ്തുകൊണ്ടേയിരിക്കും.നിളയിൽ വീണ ആലില പോലെ അത് കടലിലെത്തുവോളം പാറിയൊഴുകും.കടലിൽ പതിച്ചാലുമത് അലകളിൽ സംഗീതം പോലെ പാറി നടക്കും.ഹൊ!എന്ത് ലഹരിയാണത്. പ്രണയലഹരി!ലോകത്തിൻ്റെ ഇരുളിനെ മുഴുവൻ വെളിച്ചമാക്കുന്ന പ്രതിഭാസം!നീ അനുഭവിച്ചിട്ടുണ്ടോ അപ്പുണ്ണി അത് ?”

“അങ്ങനെ ചോദിച്ചാ എനിക്കറിയില്ല”

“അറിയാതിരിക്കില്ല; നീ അത് തിരിച്ചറിഞ്ഞു കാണില്ല “

അപ്പോഴാണ് അപ്പുണ്ണി താൻ രാവിലെ മായൻകുളത്തിൽ കുളിക്കാൻ പോയപ്പോൾ കണ്ട കാഴ്ചയും ഉണ്ടായ അനുഭവവും അതിൽ നിന്നുമുണ്ടായ പറയനാറിയാത്ത വികാരത്തെപ്പറ്റിയും പറഞ്ഞത്.അതുകേട്ട് നാണ്വോരേട്ടൻ പൊട്ടിച്ചിരിച്ചുകൊണ്ടു പറഞ്ഞു.

“എടാ ബെഡുകുസേ ഇതാ ഞാൻ പറഞ്ഞ ആ സംഗതി;പ്രണയം.ഇനിയത് മരണം വരെ തോന്നി കൊണ്ടേയിരിക്കും;എന്നാൽ എന്തുതന്നെ വന്നാലും അതിനെ ഒരിടത്ത് തങ്ങി നിൽക്കാൻ അനുവദിക്കരുത്.നിറ നിള പോലെ ഒഴുകാൻ അനുവദിക്കണം. എങ്കിലേ ഞാൻ പറഞ്ഞ അനുഭവം നിനക്കും ആസ്വദിക്കാനാവു.ഒന്നോർക്കണം പ്രണയവും പല  ആഴത്തിലും വ്യാപ്തിയിലുമായിരിക്കും മനസ്സിൽ തറച്ചിറങ്ങുക എന്നതുകൊണ്ട് അത് പല അനുഭവഭേദങ്ങളിലാവും എന്നുമാത്രം.ചിലത് വേദനയുടെ ലഹരിയാവും മറ്റ് ചിലത് ആനന്ദത്തിൻ്റെ അനിർവച്ചനീയമായ ഉൻമാദമാവും.ഇതൊന്നുമല്ലാത്ത എന്തെങ്കിലും വികാരാനുഭവവുമുണ്ടാവാം.അത് നിന്നെ ലോകസഞ്ചാരി കൊളംബസിൻ്റെ കപ്പൽ പോലെ പുതിയ പുതിയ വികാരങ്ങളുടെ അനുഭവങ്ങളുടെ മായികലോകങ്ങളിൽ കൊണ്ടെത്തിക്കും.ആ കപ്പലിൽ അലക്ഷ്യസഞ്ചാരിയാവുക നീയും.പ്രണയം ലോകം സർവ്വം ആനന്ദമയമാക്കുമെടൊ;നീ ഒഴിക്ക്“ രോമാവൃതമായ മാറിൽ അത്രനേരം വിശ്രമിച്ചിരുന്ന മധുചഷുകം നാണ്വോരേട്ടൻ അപ്പുണ്ണിയുടെ നേരെ നീട്ടി.അവൻ റാന്തൽ വെട്ടത്തിൽ തിളങ്ങുന്ന മനോഹരമായ ആ സ്ഫടികഗ്ലാസിലേക്ക് വാറ്റുചാരായം പകർന്നു. ആ സ്ഥടിക ഗ്ലാസ് പോലെ നാണോരേട്ടൻ്റെ ചുറ്റുമുള്ളവയെല്ലാം മനോഹരമാവയായിരുന്നു. മനോഹരമായ രാത്രി! മനോഹരമായ നിലാവ് ! മനോഹരമായ സംഗീതം!

വാറ്റുചാരായം നുണഞ്ഞിറക്കി നാണ്വോരേട്ടൻ തുടർന്നു.

“എനിക്ക് ചാന്ദ്നിബിശ്വാസിലും പ്രിയങ്കമുഖർജിയിൽ  നിന്നും കിട്ടിയ ലഹരിയായിരുന്നില്ല കൽക്കട്ടക്കാരി ബാസന്തിയിൽ നിന്നും കിട്ടിയത്. “

നാണ്വോരുടെ വാക്കുകളിലൂടെ  അപ്പുണ്ണി പ്രണയസഞ്ചാരിയായി സഞ്ചരിച്ചു കൊണ്ടിരുന്നുവെങ്കിലും എതോ ബോധം അവനിൽ ഒരു സംശയം ജനിപ്പിച്ചു. 

“അല്ല, ഒരു ലക്ഷ്യം ഇല്ലാണ്ട് കല്യാണോം കുടുംബൊംന്നുല്യാതെ ഇങ്ങനെ തോന്ന്യാസം കാണിച്ച് നടന്നാ ഗതിയെന്താവും ഏട്ടാ ?”

“കല്യാണം എന്താ ? കുടുംബം എന്താ ?നീ പറ “

“അതുപിന്നെ;നമ്മളിഷ്ടപ്പെടുന്ന ഒരു പെണ്ണിനെ കെട്ടി,അച്ഛനും അമ്മയുമായും മക്കളുമായി  ജീവിക്കണതല്ലെ?’

“ഒരു പശുവിനെ വാങ്ങി തൊഴുത്തിൽ കെട്ടുന്ന ലാഘവത്തോടെ അതുവരെ എന്തൊക്കെയോ ആരെയൊക്കെയോ സ്വപ്നം കണ്ട് സ്വതന്ത്രമായി ജീവിച്ചിരുന്ന ഒരു പെൺകുട്ടിയെ ജീവിതമെന്ന തൊഴുത്തിൽ കെട്ടി അതിനും അത് പെറുന്നതിനും തിന്നാന്നും കുടിക്കാനും കൊടുക്കാൻ പാടുപ്പെടുക മൊതലുണ്ടാക്കുക എന്നിട്ട് ഒരു ആത്മസംതൃപ്തിയുമില്ലാതെ ജനിച്ചതല്ലെ മരിക്കും വരെ ജീവിക്കുക എന്ന ലക്ഷ്യത്തോടെ ജീവിച്ച് ഉടുതുണി പോലും കൊണ്ടുപോകാതെ ഐവർമഠത്തിലെ എത്രയോ ശരീരങ്ങൾ എരിഞ്ഞടങ്ങിയ ചാരത്തിൽ ഒരു പിടി ചാരമായി മാറുക. ഹും അതാണപ്പോ നീ കാണുന്ന ഈ ജീവിതം”

നാണോരുടെ ആ വാക്കുകൾ അപ്പുണ്ണിയുടെ മനസ്സിലേക്ക് വില്വമല ക്വോറിയിൽ വെടിപ്പൊട്ടിക്ച്ചപ്പോൾ തെറിച്ച് വന്ന ഒരു കരിമ്പാറ പോലെ പതിച്ചു. അതിനടിയിൽപ്പെട്ട് അവൻ ഞെരുങ്ങി. കുളക്കടവ് ഒരു നിമിപ്പം ശ്മശാന നിശ്ശബ്ദതയിലാണ്ടു.നാവ് ചലിക്കാനും തൊണ്ടയിൽ നിന്ന് വാക്കുകൾ പുറത്തുവരാനും വഴിയൊരുക്കുവാനുമായി അപ്പുണ്ണിയൊന്ന് ചുമച്ചു.ഇക്കണ്ട നാൾ തൻ്റെ മനസ്സിൽ കൊണ്ടു നടന്ന ജീവിതം എന്ന സ്വപ്നം തകർന്ന് തരിപ്പണമായി.

“ഞാനെന്ത് ചെയ്യണം എട്ടാ ?” ഇരുളിൽ വഴിമുട്ടി നിന്നവൻ മുന്നോട്ട് പോവാനുള്ള വെളിച്ചം തേടുന്നപ്പോലെ അപ്പുണ്ണി ചോദിച്ചു.

“അതാണ് ഞാൻ പറഞ്ഞത്; പ്രണയിക്കുക ജീവിതകാലം മുഴുവൻ പ്രണയിച്ചു നടക്കുക അത് നിനക്ക് ലക്ഷ്യം തരും; നേട്ടങ്ങൾ കൊണ്ടുവരും. നീയറിയാതെ നീ സമ്പന്നനാവും. ഒടുവിൽ നീ ബാധയും ബാധ്യതകളുമില്ലാതെ ചിരിച്ചു കൊണ്ട് അവസാനിക്കും. അന്ന് നീ ഉണ്ടാക്കി വച്ചതെല്ലാം നിൻ്റെ ചുറ്റിലും വീതിക്കപ്പെടും അവർ നിന്നെ നന്ദിയോടെ സമരിക്കും. ഇത്രയൊക്കെ പോരടൊ?”

ആ ചോദ്യത്തിന് ഉത്തരം കണ്ടെത്താനുള്ള തീരുമാനത്തിൽ അവൻ ജീവിച്ചു തുടങ്ങി.

 “പ്രണയൊം കല്യണോം ഒക്കെ ജീവിതത്തിൽ ഒന്നല്ലെ പാടൂ ഏട്ടാ?”

“ആര് പറഞ്ഞു?മൃഗങ്ങൾക്ക് ഇണ ഒന്ന് മാത്രമാണോടാ പൊട്ടാ?” മനുഷ്യനും ഒരു മൃഗമാണ്;സമൂഹം നിയമങ്ങൾകൊണ്ടും കുടുംബം എന്ന സാമ്പ്രദായിക സാമൂഹിക സ്ഥാപനത്തിനാലും മനുഷ്യമൃഗത്തിൻ്റെ മധുരമനോഹരമായ നന്മയുള്ള വികാരത്തെ ചങ്ങലക്കിട്ടിരിക്കുകയല്ലെ? ഒരു ആണിന് ഒരു പെണ്ണ് ഒരു പെണ്ണിന് ഒരാണ് എന്നൊക്കെ പറഞ്ഞ്; ഇതൊക്കെ പറഞ്ഞിട്ട ന്തൊ കാര്യം നിൻ്റെ കൊരട്ടതലയിൽ കേറോ…കഴുതയുടെ ചെവിട്ടിൽ കാതൽ ഓവിയം പാടിയിട്ട് കാര്യമുണ്ടോ? അത് അതിൻ്റെ കാമം കരഞ്ഞു തീർക്കാൻ വിധിക്കപ്പെട്ട ജീവിയല്ലെ “‘നാണ്വോരേട്ടൻ പൊട്ടി പൊട്ടി ചിരിച്ചു. ഏട്ടൻ്റെ മുഖം ചുമന്ന് തുടത്തു.

ആ സമയം വേൽമുരുകൻ കൊട്ടകയിൽ മനുഷ്യമൃഗം എന്ന ജയൻ്റെ സിനിമ കളിക്ക്യായിരുന്നു. 

“ഞാനും ഒരു മനുഷ്യമൃഗാ ഏട്ടാ;ഇവിടെന്നങ്ട് ഇനി അങ്ങനെയെ ജീവിക്കു“ പുറത്ത് പറഞ്ഞില്ലെങ്കിൽ മനസ്സിൽ അത് ഉറപ്പിച്ചു.

“അതൊക്കെ പോട്ടേ…നീ ആദ്യാനുരാഗത്തെപ്പറ്റി ഒരുപാട് കവിതകൾ കേട്ടിരിക്കും അന്ത്യാനുരാഗത്തെപ്പറ്റി ഞാൻ ഒരിക്കൽ ഒരു കവിതയെഴുതും.എൻ്റെ എൺപതാം വയസ്സിൽ ഞാൻ ജീവിച്ചിരിപ്പുണ്ടെങ്കിൽ “

“അതെന്താ എൺപതാം വയസ്സിൽ ?’”

“കളരിക്കൽ കുട്ടൻ പണിക്കർ പറഞ്ഞിരിക്കുന്നത് എനിക്ക് ആയുസ് എൺപത്തിയൊന്നാ എന്നാ…അങ്ങനെയെങ്കിൽ എൺപതാം വയസിലാവും എൻ്റെ അന്ത്യപ്രണയം…അത് എത്ര മനോഹരമായിരിക്കും എത്ര മഹത്തരമായിരിക്കും എന്നറിയുമോ നിനക്ക് ചപലമായ പ്രണയങ്ങളിൽ നിന്നും പ്രാണൻ പ്രാണനിലേക്ക് പ്രയാണം ചെയ്യുന്ന അന്ത്യപ്രണയം. ഹൊ ഓർക്കുമ്പോൾ തന്നെ കുളിര് കോരുന്നു. എൻ്റെ എല്ലിൽ നിന്നും മാംസം വേർപ്പെട്ട് മാംസത്തിൽ നിന്നും തോൽ വേർപ്പെട്ട് പഞ്ചഭൂതങ്ങളിൽ ലയിക്കാൻ പ്രാപ്തമായി കൊണ്ടിരിക്കുന്ന ദേഹത്തിനുള്ളിൽ വേർപ്പെടാൻ നിൽക്കുന്ന ദേഹിയിലേക്ക് ഉണങ്ങി തുടങ്ങിയ തേക്കിൻ കുറ്റിയിലെ ഉണങ്ങാത്ത ഒരിഞ്ച് തോലിൽ നിന്നും കിളിർക്കുന്ന ഒരു പുതുമുള പോലെ എൻ്റെ അന്ത്യപ്രണയം! ഹാ ചിന്തിച്ച് നോക്കടാ അത് അപ്പേ” 

അവൻ്റെ കാഴ്ചയിൽ നാണ്വോരെട്ടൻ ഒരു പന ഉയരം വളർന്ന് പ്രണയപർവ്വതാകാരനായി നിൽക്കുകയാണ്. 

“ജീവിക്ക്യായാണെങ്കിൽ പ്രണയിച്ചു കൊണ്ട് ജീവിക്കടാ ബെഡുകൂസേ…ഒരല്ലലും മനസ്സിനേൽക്കാതെ…മനോഹരമായി ജീവിച്ച് പ്രണയിച്ചുകൊണ്ട് മരിക്കണം.അതാണ് എൻ്റെ കൺസെപ്റ്റിൽ യദാർത്ഥമനുഷ്യ ജീവിതം” 

അന്ന് മുതൽ നാണ്വാരേട്ടനെ അപ്പുണ്ണി തൻ്റെ ജീവിതഗുരുസ്ഥാനിയനായി കണ്ടു. അവൻ പ്രണയിച്ചു ജീവിക്കാൻ തുടങ്ങി ജീവിതത്തെ പ്രണയിച്ചു തുടങ്ങി പ്രണയത്തിന് വേണ്ടി നേടാൻ തുടങ്ങി. അപ്പുണ്ണിയുടെ മുപ്പതുകളിൽ പ്രണയത്തിൻ്റെ കുംഭമേള തന്നെ നടന്നു. അക്കാലത്ത് വർഷം അഞ്ച് എന്ന കണക്കിന് അമ്പത് പ്രണയങ്ങൾ ! പലപ്പോഴും മൂന്നും നാലും പേരെ ഒരേ സമയം അയാൾ പ്രണയിച്ചു.അവർ തിരിച്ചും. ആ പ്രണയങ്ങൾ അപ്പുണ്ണിയെ കൊടകയിലെ ടിക്കറ്റ് കീറലിൽനിന്നും ഓപ്പറേറ്ററിലേക്കുയർത്തി. നാൽപതുകളിലും അതാവർത്തിച്ചു. 

 ചെട്ട്യാർ സിനിമകൊടക തുറന്നത് അയാളുടെ ഭാര്യയുടെ സിനിമപ്രാന്ത് കാരണമായിരുന്നു. പൊള്ളാച്ചിക്കാരിയായിരുന്ന അവരുടെ ജീവിതത്തിൽ സിനിമ ഒഴിച്ചു കൂടാനാവാത്ത ഘടകമായിരുന്നു. അവർ മരിച്ചപ്പോഴാണ് ചെട്ട്യാർ കൊടകയുടെ നടത്തിപ്പ് അപ്പുണ്ണ്യാരെ ഏൽപ്പിക്കുന്നത്. പിന്നെ പറയണ്ടല്ലൊ പതിയെ വേൽമുരുകൻ കൊടക അപ്പുണ്ണ്യാര് വിലക്ക് വാങ്ങി. കൊടക്ക ടാക്കീസാക്കി.ടാക്കീസ് തിയേറ്ററായി. അപ്പോഴെക്കും സിനിമ പ്രണയം പോലെ അവൻ്റെ രക്തത്തിലും ജീവനിലും കലർന്നിരുന്നു. കാരണം,പ്രണയം പലവിധ ഭാവങ്ങളിൽ പൂത്തു പരിലസിച്ചതും പാടി കൊഴിഞ്ഞു വിണതും സിനിമയിലും അതിൻ്റെ കാതലറിഞ്ഞ അവൻ്റെ  ജീവിതത്തിലും മാത്രമായിരുന്നു.ഒടുവിൽ പ്രണയം അയാളെ സിനിമ നിർമ്മാതാവും സംവിധായകനും നടനുമാക്കി. അതിനിടയിൽ എത്രയോ പ്രണയങ്ങൾ സ്ത്രീവേഷമണിഞ്ഞ് അവൻ്റെ പല പ്രായങ്ങളിൽ അവനോടൊത്ത് ജീവിച്ച് പിരിഞ്ഞുപോയി.പി എ നായർ എന്ന പത്തായപ്പുരക്കൽ അപ്പുണ്ണിനായർ എൺപതാം വയസ്സിലും പ്രണയനായകനായി പടമിറങ്ങി അതും മെഗാഹിറ്റായിരുന്നു.ഒടുവിൽ അയാൾ ചെയ്ത സിനിമയായിരുന്നു “എൻ്റെ പ്രണയ പരീക്ഷണങ്ങൾ“ അതിൻ്റെ ക്ലൈമാക്സ് സീൻ ഷൂട്ട് ചെയ്യുമ്പോഴാണ് അയാൾ തളർന്നിരുന്നത്. പിന്നെ അയാൾ എഴുന്നേറ്റില്ല.എൺപതുകാരനെ പ്രണയിക്കുന്ന നായികയായി പുതുമുഖം ഇരുപ്പത്തിരണ്ട്കാരി കാതറിൻ നായികയായി വന്നു. നൂറ്റിഇരുപത് ദിവസത്തെ ഷൂട്ടായിരുന്നു ചിത്രത്തിന് പ്ലാൻ ചെയ്തിരുന്നത്. തൊണ്ണൂറ്റി രണ്ടാം ദിനം ക്ലൈമാക്സ് സീനൊഴികെ ബാക്കിയെല്ലാം ചിത്രീകരിച്ചു കഴിഞ്ഞിരുന്നു. അപ്പുണ്ണ്യാര് തന്നെയാണ് ക്ലൈമാക്സ് അവസാനം ചിത്രീകരിച്ചാൽ മതിയെന്ന് തീരുമാനിച്ചത്. ജീവിതം തന്നെ ഒരോ നിമിഷവും അടുത്ത നിമിഷം എന്തെന്ന ത്രില്ലോടെ കടന്ന് പോവുമ്പോൾ പ്രണയം അതിലും ത്രില്ലുള്ള നിമിഷങ്ങളല്ലെ സമ്മാനിക്കുക. അതിൻ്റെ സൂക്ഷമമായ ഭാവ മുഹുർത്തങ്ങൾ ചിത്രീകരിക്കപ്പെടണം അധികവും എക്സ്ട്രീം ക്ലോസപ് ഷോട്ടുകളിലാണ് അവയെല്ലാം ചിത്രീകരിക്കേണ്ടത്.നായകൻ്റെയും നായികയുടെയും ഒരോ അംഗചലനങ്ങളും  ചിത്രീകരിക്കപ്പെടണം.അവയെല്ലാം വികാരങ്ങളുടെ സ്കെയിലിൽ അളന്ന് ഏറ്റിയും കുറച്ചും അവിടവിടെ വേണ്ടുന്നിടത്ത് ഇൻസർട്ട് ചെയ്യണമെന്ന് സ്‌പ്പോട്ട് എഡിറ്റർക്ക് അപ്പുണ്ണ്യാർ നിർദ്ദേശം നൽകിയിരുന്നു. ഓരോ ദിവസവും അന്നാന്ന് ചിത്രീകരിച്ച സീനുകൾ എഡിറ്റ് ചെയ്ത് അദ്ദേഹം കണ്ടു കൊണ്ടിരുന്നു. അനാവശ്യമായതും ആവശ്യമായതും തിരിച്ചറിഞ്ഞ് റീഎഡിറ്റ് ചെയ്യപ്പെട്ടു. ആ രംഗങ്ങൾ കാണെകാണെനായികയ്ക്ക് അപ്പുണ്ണ്യാരോട് അനീർവച്ചനീയമായ ഒരു വികാരവും ബന്ധവും ഉടലെടുത്തു. എപ്പോഴും കണ്ണിൽ കണ്ണിൽ നോക്കിയിരിക്കുന്ന അവരുടെ പെരുമാറ്റം കണ്ട് സെറ്റിലുള്ളവരുടെ കാഴ്ചയിൽ അസൂയയും വെറുപ്പും വരെ ഉണ്ടായി. പലരും പിറുപിറുത്തു 

“കിളവൻ ആ കിളുന്തുപെണ്ണിനോട് ; ഛെ “ യുവ ക്യാമറമാൻ മുഖം തിരിച്ചു.

“ആ കിളവൻ അങ്ങനെയാണെങ്കിൽ ഈ പെണ്ണ് അതിന് നിൽക്കാമോ?“അസിസ്റ്റൻ്റ് ഡയറക്ടറായ ചെറുപ്പകാരൻ നായികയെ കുറ്റം പറഞ്ഞു.

“അയാൾ എവിടെ പോയിരുന്നാലും മുന്നിൽ ചെയറിട്ട് അയാളെ തന്നെ നോക്കി അവളിരിക്കുന്നത് കണ്ടില്ലെ!?” മേയ്ക്കപ്പ്മാൻ്റെ സഹായി ആണ് അത് പറഞ്ഞത്.

എല്ലാം അപ്പുണ്ണ്യാരും ഞാനും കേൾക്കുന്നുണ്ടായിരുന്നു.അദ്ദേഹം ആ വാക്കുകളെല്ലാം ആസ്വദിക്കുകയായിരുന്നു. പലപ്പോഴും ചിത്രീകരണസമയം കഴിഞ്ഞും നായിക അയാളെ തൊട്ടുരുമ്മി നിന്നു.അവളുടെ കണ്ണുകളിൽ അയാൾക്ക് വയസ്സ് ഇരുപ്പത്തിയഞ്ച് പോലും ആയിരുന്നില്ല.

 ഒരു രാത്രി അടുത്ത ദിവസമെടുക്കേണ്ട സീനുകളുടെ ചർച്ചകളും പ്ലാനും കഴിഞ്ഞ് ക്യാമറാമാനും അസോസിയേറ്റും മറ്റു സഹായികളും പോയിതിന് ശേഷം റൂമിൽ ഞാനും അപ്പുണ്ണ്യാരും തനിച്ചായിരുന്നു. നായികയുടെ വാട്ട്സ്പ് മെസേജുകൾ വന്നു കൊണ്ടിരുന്നത് താൻ ശ്രദ്ധിച്ചു.

“സെറ്റിൽ പലതും പറയുന്നത് കേൾക്കുന്നുണ്ടല്ലൊ അല്ലെ?’

“ഉം.കേൾക്കുന്നുണ്ട്.എൺപതാംവയസ്സിലെ എൻ്റെ പ്രണയത്തെക്കുറിച്ചുള്ള ഗോസിപ്പുകളല്ലെ?”

“ആ പെൺകുട്ടി’; വാക്കുകൾ മുഴുവനാകുന്നതിന് മുമ്പ് അദ്ദേഹം ഇടപ്പെട്ടു

“എടോ ഞാനവളെ തൊട്ടിട്ടു പോലുമില്ല ഷോട്ടുകൾക്ക് വേണ്ടിയല്ലാതെ താൻ കാണുന്നതല്ലെ?’”

“ഇവിടെ ശരീരമല്ലല്ലൊ ആത്മാവല്ലെ പ്രധാനം? “

“ആ ആത്മാവിനെ ഞാൻ ആവാഹിച്ചെടുത്തു എന്നാണോ താൻ ആരോപിക്കുന്നത്? കഴിഞ്ഞ ദിവസം അവളെ കാണാൻ വന്ന ആ പയ്യനില്ലെ അവളുടെ ലൗവർ അവനോട് അവൾ ബ്രേക്ക് പ്പ് പറഞ്ഞത്രെ…അവൻ അവളെ ഭീഷണിപ്പെടുത്തി കൊണ്ടിരിക്കുകയാ അവർ തമ്മിൽ പണിയുന്ന വിഡിയോ ഇൻ്റർനെറ്റിൽ ഇടുമെന്ന് പറഞ്ഞ് അവൾ പറഞ്ഞത്രെ ഇട്ടോളാൻ; തനിക്ക് ഒരു ചുക്കുമില്ല.തൻ്റെ ജീവിതമാണ് തീരാൻ പോകുന്നതെന്ന്. തിരിച്ച് ഭീഷണിപ്പെടുത്തിയത്രെ ; ഈ വോയ്സ് ക്ലിപ്പൊന്ന് കേട്ട് നോക്ക് “

അയാൾ വാട്ട്സപ് തുറന്ന് അവളുടെ നമ്പറിൽ നിന്നും വന്ന  ശബ്ദസന്ദേശങ്ങൾക്കിടയിൽ നിന്നും ഒന്ന് കേൾപ്പിച്ചു

“…അവൻ ഞങ്ങടെ സ്വകാര്യവിഡിയോ ഇൻ്റർനെറ്റിൽ അപ്ലോഡ് ചെയ്യുമമെന്നും നമ്മളെപ്പറ്റി ഇൻസ്റ്റയിലും എഫ് ബീലും പോസ്റ്റിട്ടുമെന്നും ഭീഷണിപ്പെടുത്തി. ഞാൻ പറഞ്ഞു ചെയ്തുതോളാൻ ആണിനില്ലാത്ത മാനമൊന്നും പെണ്ണിനും പോവാനില്ലല്ലൊ? അങ്ങനെ ചെയ്താൽ അകത്താകാൻ പോകുന്നതും ജീവിതം പോകുന്നതും നിൻ്റെയായിരിക്കുമെന്ന് ഞാനും പറഞ്ഞു. നശ്വരമായ ശരീരമില്ലാത്ത പ്രണയം ഞാനിപ്പോൾ അനുഭവിക്കുയാണ്. എൺപതുകളിലും തൊണ്ണൂറുകളിലും കഥകളിലും നോവലുകളിലും സിനിമകളിലും മാത്രം കണ്ട മനസ്സുകളുടെ ആ ത്രസിപ്പ്; അത് എക്സ്പ്പോർ ചെയ്യാൻ പറ്റുകയെന്ന്  പറഞ്ഞാൽ ; ആരോഗ്യം നോക്കണം ജീവിക്കുന്ന കാലം ഈ അനുഭവം എനിക്ക് തരണം.ഐ ലൗ യൂ സോ മച്ച് ഉമ്മാ ഗുഡ് നൈറ്റ്’”

ആ വോയ്സ് മെസേജ് കേട്ട് എനിക്ക് എന്തു പറയണമെന്ന് അറിഞ്ഞില്ല. 

“നാളെ ഇതിൻ്റെയെല്ലാം ക്ലൈമാക്സ് എടുക്കണ്ടേതാ; നമുക്ക് ഒന്ന് കണ്ണടയ്ക്കാമെടൊ “ എന്നും പറഞ്ഞ് അദ്ദേഹം കട്ടിലിലേക്ക് ചാഞ്ഞു. ഞാനും ലൈറ്റ് കെടുത്തി കിടന്നു. പ്ലാൻ ചെയ്ത ക്ലൈമാക്സ് ഷൂട്ടിനായി ഇന്നലെ ഞങ്ങൾ കുന്നിൻ മുകളിലെ ആയിരത്തിഅഞ്ഞൂറ് വർഷത്തോളം പുരാതനമായ ശിവക്ഷേത്രത്തിൻ്റെ ലൊക്കേഷനിൽ എത്തി മൂന്ന് ഷോട്ടുകൾ എടുത്തു.എല്ലാം എക്സ്ട്രീം ക്ലോസ്. 

സുക്ഷ്മമായ വികാരപ്രകടനങ്ങൾ”

 പി കെ പി ഒന്ന് ദീർഘമായി നിശ്വാസിച്ചു. അതേ നിശ്വാസം ജയകൃഷ്ണനിൽ നിന്നും പുറത്തുവന്നു.

കാറിനുള്ളിൽ ഒരു നിമിഷം നിശ്ശബ്ദത തളം കെട്ടി. “വാട്ട്  എ മാർവെല്ലസ് ലൗ സ്റ്റോറി!! ഇങ്ങനെയും മനുഷ്യർ ജീവിച്ചിരിക്കുമോ? ജീവിച്ചിരിക്കെ തന്നെ ദേഹിയും ദേഹവും വേർപ്പെടുത്തി ജീവിക്കാൻ കഴിയുക എന്നത് എത്ര മഹത്തരമാണ് !!” ജയകൃഷ്ണൻ പിറുപിറുക്കും പോലെ പറഞ്ഞു.

      കാർ ഇരുവശവും തെങ്ങുകൾ വളർന്ന് നിൽക്കുന്ന പാടങ്ങൾക്ക് നടുവിലൂടെയുള്ള പാതയിലൂടെ മുന്നോട്ട് നീങ്ങി. എതിരെ കാൽ നടയായും വാഹനങ്ങളിലും ആളുകൾ വരികയും പോവുകയും ചെയ്തുകൊണ്ടിരുന്നു. രണ്ടായിരത്തിഇരുപ്പത്തിയഞ്ചിലും ഗ്രാമീണതയുടെ നിഷ്കളങ്കതയും പവിത്രതയും കളഞ്ഞുപോവാതെ സൂക്ഷിച്ച് വച്ചിരിക്കുന്ന ആ ഗ്രാമം ഇന്ന് വാഹനങ്ങളുടെ പുക ശ്വാസിച്ച് ക്ഷീണിതയാവും. തണുത്ത ഇളം കാറ്റ് സൂപ്പർ സ്റ്റാറിൻ്റെ മുഖത്ത് തലോടി കൊണ്ട് കാറിനകത്ത് കൂടെ മറുവശത്തേക്ക് കടന്നുപോയി അത്രയും പതിയെ ആണ് ഡ്രൈവർ വണ്ടിയോടിച്ചിരുന്നത്. പി കെ പ്ലാച്ചോട് പറഞ്ഞ അപ്പുണ്ണ്യാരുടെ ആത്മകഥ അയാളെ മറ്റേതോ ലോകത്ത് എത്തിച്ചിരുന്നു.

“സാർ ഈ കഥ നമുക്ക് സിനിമയാക്കിയാലോ ?” ഡ്രൈവർ ചോദിച്ചു. അയാളാണ് കാലങ്ങളായി സൂപ്പർ സ്റ്റാറിന് വേണ്ടി കഥ കേട്ടിരുന്നത്.

ഒരു ദീർഘനിശ്വാസത്തോടെ ഉള്ളിൽ വീർപ്പുമുട്ടി നിന്ന വികാരങ്ങൾ പുറത്താക്കി ജയകൃഷ്ണൻ ഉറച്ച വാക്കുകളിൽ പറഞ്ഞു 

“ഈ കഥ നമ്മൾ സിനിമയാക്കും എൻ്റെ ആദ്യനിർമ്മാണ സംരംഭമായിരിക്കും ഇത്; പി കെ പി കഥയും തിരക്കഥയും സംഭാഷണവുമെഴുതി സംവിധാനം ചെയ്യും.എന്താ സമ്മതിച്ചോ?”

പി കെ പി ആ പ്രഖ്യാപനം കേട്ട് സതംഭിച്ചിരുന്നു. 

“ടൈറ്റിൽ ഇതാണ്; അപ്പുണ്ണ്യാരുടെ ആദിമധ്യാന്തപ്രണയങ്ങൾ. എങ്ങനെയുണ്ട്?”

“ഈ വർഷത്തെ മെഗാഹിറ്റ് സിനിമയുടെ ടൈറ്റിൽ ഇതു തന്നെ!” പി കെ പി മായികലോകത്തിരുന്ന് മന്ത്രിച്ചു.എവിടെയൊക്കെ മുട്ടിയിട്ടും തട്ടിയിട്ടും സിനിമയാവാതെ പോയ എഴുപതാം വയസ്സിലും തൻ്റെ തോൾസഞ്ചിയിൽ ഉറങ്ങുന്ന തിരക്കഥകളെ അയാൾ വെറുത്ത് കുപ്പക്കുനയിലിട്ട് തീ കൊളുത്തി.അപ്പുണ്ണ്യാരുടെ ആദിമധ്യാന്ത പ്രണയങ്ങളെ അയാൾ മനസ്സാൽ നമിച്ചു.വേൽമുരുകൻ കൊട്ടകയിൽ ചായ വിറ്റ് നടന്ന കണ്ണൻ ചെക്കനെ പി കെ പാലച്ചോടും പി കെ പിയാക്കിയതുമെല്ലാം അപ്പുണ്ണ്യാരായിരുന്നു.  ദേ ഇപ്പൊ കഴിഞ്ഞ ഇരുപത് കൊല്ലമായി സിനിമക്കാരെല്ലാം അകറ്റി നിർത്തിയ തന്നെ അപ്പുണ്ണ്യാരുടെ കഥ തന്നെ വീണ്ടും ചുവന്ന പരവതാനി വിരിച്ച് അതിലൂടെ അതിൻ്റെ തല തൊട്ടപ്പനായി നിൽക്കുന്ന സൂപ്പർ സ്റ്റാറിൻ്റെ കൈ പിടിച്ച് ആനയിക്കുന്നു.

“ദേ ഈ വീഡിയോ ഒന്ന് കാണണം. ഒന്നും അവസാനിച്ചിട്ടില്ല” പി കെ പി തൻ്റെ  ഫോൺ ഗ്യാലറിയിൽ നിന്നും ഒരു വിഡിയോ പ്ലേയാക്കി ജയകൃഷ്ണന് നൽകി.

ആഡംബര ഹോട്ടലിൻ്റെ ശീതളികരിച്ച റോയൽ സ്യൂട്ടിലെ മുറിയിലെ വെളുത്ത വിരിപ്പ് വിരിച്ച മെത്തമേൽ കട്ടിലിൻ്റെ ക്രാസിയിൽ തലയണ ചാരിവച്ചിരുന്ന് സംസാരിക്കാൻ തുടങ്ങുന്ന അപ്പുണ്ണ്യാർ.

“ഈ വിഡിയോ ഞാൻ ചെയ്യുന്നത് ഇന്നുള്ള എല്ലാ മാധ്യമങ്ങൾക്കും വേണ്ടിയാണ്. ഞാൻ മരിച്ചാൽ എൻ്റെ സ്വത്തുക്കളിൽ കാൽഭാഗം എൻ്റെ സഹോദരന്മാരുടെ മക്കൾക്ക് അവകാശപ്പെട്ടതാണ്. മറ്റൊരു കാൽ ഭാഗം എൻ്റെ പ്രണയിനിമാർ എന്ന് അവകാശപ്പെട്ട് വരുന്നവർക്ക് തുല്യമായി വീതിച്ചു നൽകുകയും ബാക്കിയുള്ളതെല്ലാം എൻ്റെ പേരിൽ ഒരു മെമ്മോറിയൽ  ട്രസ്റ്റ് രൂപികരിച്ച് ആ ട്രസ്റ്റിൻ്റെ കീഴിലാക്കി റിട്ടയർമെൻ്റ് ഹോം നിർമ്മിച്ച് അതിൽ അവിവാഹിതരായ സ്ത്രീപുരുഷ ഭേദമന്യേയുള്ള സീനിയർസിറ്റിസൺസിനെ താമസിപ്പിക്കണം.അവർക്ക് ആഹ്ലാദത്തോടെ ശിഷ്ടകാലം ജീവിക്കാൻ വേണ്ട എല്ലാ സൗകര്യങ്ങളും ഒരുക്കണം.ട്രസ്റ്റിൻ്റെ രക്ഷാധികാരിയായി എൻ്റെ ആത്മമിത്രവും തിരക്കഥാകൃത്തുമായ പികെപി എന്നറിയപ്പെടുന്ന പാലച്ചോട്ടിൽ  കണ്ണൻ പറങ്ങോടനെ നിയമിച്ചിട്ടുള്ളതാകുന്നു.അവന് ആവശ്യമുള്ള സംഖ്യ എത്രയാണോ അത് കൃത്യമായി വൗച്ചറെഴുതി എടുക്കാവുന്നതും ട്രസ്റ്റിൻ്റെ എല്ലാ ചെല്ലവുകളും വാർഷികാടിസ്ഥാനത്തിൽ ഓഡിറ്റിന് വിധേയമാക്കി സിവിൽ ജഡ്ജിൻ്റെ മുന്നിൽ ഹാജരാക്കി സാക്ഷ്യപ്പെടുത്തി സൂക്ഷിക്കേണ്ടതുമാണ്.എക്കാലത്തും എൻ്റെ കൂടെ നിന്ന എല്ലാ മാധ്യമസുഹൃത്തുകൾക്കും മറ്റെല്ലാവർക്കും നന്ദി”

‘‘വാട്ട് എ ഗ്രേറ്റ് മാൻ അദേഹത്തിൻ്റെ എല്ലാ പ്രണയങ്ങളും അനശ്വരമായി മലയാള സിനിമയുടെ ചരിത്രത്തിൽ ഇടം പിടിക്കും.” വീഡിയോ കണ്ട് കണ്ണകൾ നിറഞ്ഞ് ജയകൃഷ്ണൻ പറഞ്ഞു.

സൂപ്പർസ്റ്റാറിൻ്റെ ആഡംബരക്കാർ വരുന്നത് കണ്ട് ഫെയർവെൽ ഇവൻ്റ്മാനേജ്മൻ്റ് ടീമിൻ്റെ ഭീമഘടോൽകച്ചരൂപികളായ ബൗൺസർമാർ ജനങ്ങളെ ഇരുവശങ്ങളിലേക്കും ഒതുക്കി വഴിയൊരുക്കി.

      പി കെ പാലച്ചോട് എന്ന നിബൊടിഞ്ഞ തിരക്കഥാകൃത്ത് ഏറെ കാലത്തിന് ശേഷം തൻ്റെ ഫൗണ്ടൻപേനയിൽ മഷി നിറയ്ക്കാനുള്ള മഷി വാങ്ങുന്നതിനെക്കുറിച്ച് വേവലാതിപ്പെട്ടു. ജയകൃഷ്ണൻ ഭീമമായ തുക സ്പോട്ട് അഡ്വാൻസായി നൽകുകയും ഒരു ന്യൂജെൻ സിനിമയുടെ എഴുത്തുകാരനെ അയാൾക്ക് അസിസ്റ്റൻ്റായി നിയമിക്കുകയും ചെയ്തുകൊണ്ട് ആ വേവലാതിക്ക് വിരാമിട്ടു.

     സൂപ്പർസ്റ്റാർ കാറിൽ നിന്നും ഇറങ്ങി മൃതശരീരം സൂക്ഷിച്ചിരുന്ന ഫ്രീസറിന് അടുത്തേക്ക് ചെല്ലുമ്പോഴാണ് മറ്റൊരു മാസ്മരിക ദൃശ്യാനുഭവമുണ്ടായത്.മൃതശരീരം വച്ചിരുന്ന ഫ്രീസറിന് ചുറ്റുമായി ഇട്ടിരുന്ന കസേരകളിൽ ഇരിക്കുന്ന പല പ്രായത്തിലുള്ള പല അകാര- രൂപഭംഗിയുള്ള കറുപ്പും വെളുപ്പും മാനിറത്തിലുമുള്ള നൂറോളം സുന്ദരികളായ സ്ത്രീകൾ. സൗത്തിന്ത്യൻ -ഉത്തരേന്ത്യൻ സിനിമകളിലെ  പല നടിമാരും അക്കൂട്ടത്തിൽ ഉണ്ടായിരുന്നു.  ചിലർ വട്ട മുഖവും പതിഞ്ഞ മൂക്കും തടിച്ച ചുണ്ടുകളും വലിയ കണ്ണകള്ളു ള്ളവരുമായിരുന്നു. ചിലർ മെലിഞ്ഞ് കവിളുകൾ ഒട്ടിയ നീണ്ട മൂക്കോട് കുടിയ വീതി കുറഞ്ഞ ചുണ്ടുള്ളവരായിരുന്നെങ്കിലും അവർക്കും കണ്ണുകൾ വലുതായിരുന്നു.തടിച്ചവരും മെലിഞ്ഞവരുമുണ്ടായിരുന്നു.ഉയരമുള്ളവരും കുറഞ്ഞവരുമുണ്ടായിരുന്നു. വായാടികളും മൗനവതികളുമുണ്ടായിരുന്നു.അവരെല്ലാം അപ്പുണ്ണ്യാരുടെ പ്രണയിനിമാരോ കാമിനിമാരോ ആയിരുന്നു.ആ കാഴ്ച ജയകൃഷ്ണൻ്റെ മുഖത്ത് അത്ഭുതപരവേശമാണുണ്ടാക്കിയത് തിരിച്ചറിഞ്ഞ് വിജയൻ അയാളുടെ ചെവിയിൽ മന്ത്രിച്ചു. 

“സാർ നമ്മൾ നിൽക്കുന്നത് ഒരു മരണവീട്ടിലാണ്.ഒരുപ്പാട് കാമറകൾ താങ്കളുടെ ഭാവങ്ങൾ ഒപ്പിയെടുത്തു കൊണ്ടിരിക്കുന്നു.പലതും ലൈവാണ്;ഇപ്പോൾ അല്പം ദുഃഖഭാവം അങ്ങയുടെ മുഖത്ത് ഉണ്ടായാൽ നന്നായിരുന്നു. ഇല്ലെങ്കിൽ “ ആ ഓർമ്മപ്പെടുത്തൽ സംവിധായകനിൽ നിന്നും ആക്ഷൻ എന്ന കമൻ്റ് കേട്ടതുപോലെ സൂപ്പർസ്റ്റാർ അനിയന്ത്രിതമായ കരച്ചിൽ ഒതുക്കാൻ ശ്രമിച്ച് അപ്പുണ്ണ്യാരുടെ കാൽച്ചുവട്ടിൽ വീണ് നമസ്ക്കരിച്ചു.സൂപ്പർസ്റ്റാറിൻ്റെ കണ്ണുനീർ കണ്ട് പുരുഷാരം കണ്ണീർ വാർത്തു.റിവ്യൂർമാരും വ്ലോഗർമാരും ഫാൻസും ആ രംഗത്തിന് അനുകൂലമായും പ്രതികൂലമായും റിവ്യൂ പറയുകയും എഴുതുകയും ചെയ്തു. അവയ്ക്ക് താഴെ പല അഭിപ്രായങ്ങൾ കമൻറുകളായി. ലൈക്കുകളും ഡിസലൈക്കുകളും കുമിഞ്ഞു കൂടി. ഷെയറുകളും ഫോളോവേഴ്സും കെ കണക്കിന് വർദ്ധിച്ചു.ആ ഒറ്റ വീഡിയോ പോസ്റ്റ് ചെയ്തവരും ലൈവിട്ടവരുമായ സോഷ്യൽ മീഡിയ ഇൻഫ്ലുവൻസമാർക്ക് ചാകരയായിരുന്നു.

   ശ്രീമാൻ.അപ്പുണ്ണ്യാർ എന്ന പ്രണയപരമപിതാവിൻ്റെ കഥയറിയാത്തവർ നവമാധ്യമങ്ങളിൽ സൂപ്പർസ്റ്റാറിനെ ഫോക്കസ് ചെയ്ത് വാഴ്ത്തിയും വീഴ്ത്തിയും ലേഖനങ്ങളെഴുതി.അവയിൽ മിക്കതും  ജയകൃഷ്ണൻ വായിച്ചുരസിച്ചു. വാഴ്ത്തിയാണെങ്കിലും വീഴ്ത്തിയാണെങ്കിലും സകല സമയവും എങ്ങും താൻ നിറഞ്ഞുനിൽക്കണം.നാല് ദിവസം തികച്ചും കാണാതെ വന്നാൽ മറ്റുള്ളവർ നമ്മളെ മറന്നു കളയും.ഇപ്പോഴുള്ള ഫാൻസും ചങ്ക് പറച്ചു തരുന്നവരല്ല;അപ്പുണ്ണ്യാരെ കാണാൻ വന്നതിനാൽ ഒരു പടം ഇറങ്ങുന്നതിനെക്കാൾ ഹൈപ്പ് കിട്ടിയിരിക്കുന്നു തനിക്ക് എനോർത്ത് അയാൾ സന്തോഷിച്ചു.

മുന്നിലിരിക്കുന്ന അപ്പുണ്ണ്യാരുടെ പ്രണയിനി-കാമിനിമാരുടെ കൂടത്തിൽ തല കുമ്പിട്ടിരിക്കുന്ന ഇരുപത്തിമൂന്നക്കാരിയെ ചുണ്ടി പി കെ പി പറഞ്ഞു.

“ആ നരച്ച മുടി ബോയ് കട്ടടിച്ച സ്ത്രീയുടെ പുറകിലിരിക്കുന്നതാണ് അപ്പുണ്ണ്യാരുടെ അവസാനത്തെ പ്രണയിനി.സ്ത്രീ സാമുദ്രിക ലക്ഷണങ്ങൾ എല്ലാം തികഞ്ഞവൾ“

ജയകൃഷ്ണൻ അവളെ ശ്രദ്ധിച്ചു.കണ്ണുകൊണ്ടളന്നു.മനസ്സിൽ പലതും കണക്ക് കൂട്ടി. ഒടുവിൽ പി കെ പി യുടെ കാതിൽ മന്ത്രിച്ചു.

“ഇവളാണ് അപ്പുണ്ണ്യാരുടെ ആദിമധ്യാന്ത പ്രണയങ്ങളിലെ പ്രധാന നായിക “

“ഉം.’ പികെപിയും അത് മനസ്സുകൊണ്ട് തീർച്ചപ്പെടുത്തിയിരുന്നതാണ്. അപ്പുണ്ണ്യാരുടെ മരണത്തിൻ്റെ ചൂടാറുമുമ്പേ സൂപ്പർസ്റ്റാറിൻ്റെ  പ്രണയകാവ്യം ഡിജിറ്റൽ സ്ക്രീനുകളിലൂടെ ഭൂലോകമാകെ കളിച്ചു.സിനിമ മോളിവുഡിൽ നിന്നും ആദ്യ ആയിരം കോടി ക്ലബ്ബിൽ കയറി. ജെൻസി പിള്ളേർ വിഷാദവും നിർവ്വികാരതയും വെടിഞ്ഞ്, പ്രേമലു എന്ന ചിത്രത്തിന് ശേഷം പ്രണയത്തെ ആസ്പദമാക്കി വന്ന അപ്പുണ്ണ്യാരുടെ ആദിമധ്യാന്ത പ്രണയങ്ങളെ അടിസ്ഥാനമാക്കി “ഉദാത്തപ്രണയം എന്ന വികാരവും അതിൻ്റെ സ്കോപ്പും - അഫറ്റർ കൊറോണ“ എന്ന തലക്കെട്ടിൽ എ ഐയിൽ റിസർച്ച് നടത്തി കൊണ്ടിരുന്നു. മിലേനിയൽസാകട്ടെ "ഇതൊക്കെ എന്ത് ലൗ സ്റ്റോറി ;അതെല്ലാം ഞങ്ങളുടെ കുട്ടിക്കാലത്ത് ഓണത്തിനും വിഷുവിനും ഇറങ്ങിയ ലൗ സ്റ്റോറികളാണ് ലൗ സ്റ്റോറികൾ" എന്ന് നിരാശയോടെ നിരൂപിച്ചു.പി കെ പി, ജെൻസി കിഡ്സിൻ്റെ വൈബറിഞ്ഞ് അടുത്ത പടം അനൗൺ ചെയ്തു.ബെസ്റ്റിസ് ഓഫ് ബേബിമോൾ

          ◼️ അവസാനിച്ചു